راجر فیڈرر آسٹریلین اوپن کے فائنل میں پہنچ گئے

راجر فیڈرر آسٹریلین اوپن کے فائنل میں پہنچ گئے

سابق عالمی نمبر ایک اور سب سے زیادہ گرینڈ سلیم مقابلے جیتنے کا اعزاز رکھنے والے سوئٹزرلینڈ کے راجر فیڈرر آسٹریلین اوپن کے فائنل میں پہنچ گئے ہیں۔

35 سالہ فیڈرر ٹینس سے چھ ماہ کی دوری کے بعد اپنا پہلا ٹورنامنٹ کھیل رہے ہیں اور انھیں اس مرتبہ درجہ بندی میں 13واں نمبر دیا گیا تھا۔

جمعرات کو کھیلے جانے والے سیمی فائنل میں فیڈرر نے اپنے ہم وطن سٹینسیلاس واورنکا کو ایک سخت مقابلے کے بعد دو کے مقابلے میں تین سیٹس سے شکست دی۔

تجربہ کار فیڈرر نے پہلا سیٹ سات پانچ اور دوسرا چھ تین کے سکور سے جیتا تو لگ رہا تھا کہ یہ سیمی فائنل ایک یکطرفہ مقابلہ ثابت ہو سکتا ہے۔

تاہم اس موقع پر وارونکا کھیل میں واپس آئے اور اگلے دونوں سیٹس میں انھوں نے فیڈرر کا جم کر مقابلہ کیا اور یہ سیٹ چھ ایک اور چھ چار سے جیت لیے۔

میچ برابر کرنے کے بعد وارونکا تھکے تھکے دکھائی دے رہے تھے اور پھر پانچویں اور فیصلہ کن سیٹ میں فیڈرر کا تجربہ ان کے کام آیا اور وہ چھٹی گیم میں وارونکا کی سروس بریک کرنے میں کامیاب رہے۔

اس برتری کے بعد فیڈرر نے پیچھے مڑ کر نہیں دیکھا اور یہ سیٹ چھ تین سے جیت کر فائنل میں جگہ بنا لی۔

فتح کے بعد ان کا کہنا تھا کہ ’میں نہیں جانتا کہ میں نے کتنے بریک پوائنٹ بچائے۔ مجھے لگا تھا کہ پانچویں سیٹ میں سٹین کو بیس لائن پر برتری تھی اس لیے مجھے جارحانہ انداز میں کھیلنا ہوگا۔‘

انھوں نے یہ بھی کہا کہ ’میں نے کبھی خواب میں بھی نہیں سوچا تھا کہ میں اس آسٹریلین اوپن میں اس مرحلے تک پہنچ پاؤں گا۔ یہ انتہائی خوبصورت اور شاندار چیز ہے۔ میں بہت خوش ہوں۔‘

مردوں کا دوسرا سیمی فائنل جمعے کو سپین کے رافیل ندال اور بلغاریہ کے گریگور دیمیتروو کے مابین کھیلا جائے گا۔