کرناٹک میں سخت ترین سیکورٹی میں ٹیپوسلطان کی یوم پیدائش کی تقاریب

کرناٹک میں سخت ترین سیکورٹی میں ٹیپوسلطان کی یوم پیدائش کی تقاریب

 

بنگلور: کرناٹک میں سخت ترین حفاظتی انتظامات میں ٹیپوسلطان کی یوم پیدائش تقاریب منائی گئی جبکہ بی جے پی اور دیگر زعفرانی جماعتوں نے اس کے خلاف ریاست بھر میں احتجاج کیا۔ ریاست میسور کے 18ویں صدی کے حکمراں ٹیپوسلطان کی یوم پیدائش منائے جانے پر جہاں سیاسی ماحول گرم رہا وہیں لوگوں میں بھی رائے منقسم نظر آئی۔ اپوزیشن بی جے پی اور کئی ہندو تنظیموں اور افراد نے حکومت کرناٹک کی جانب سے ٹیپو جینتی منائے جانے کے خلاف ریاست بھر میں احتجاج کیا۔

حکومت نے کسی بھی ناخوشگوار واقعہ کو ٹالنے کے لئے پولیس‘ ریزرو پولیس‘ ریاپڈ ایکشن فورس کے 54ہزار جوانوں کو متعین کیا تھا جنہوں نے صورتحال پر سخت نظر رکھی۔ ضلع مستقروں پر تقاریب کا اہتمام کیا گیا جہاں انچارج وزراء اور دوسروں نے ٹیپوسلطان کی خدمات کو سراہا۔اطلاع ہے کہ ایک ریاستی ٹرانسپورٹ کی بس سمیت کئی گاڑیوں پر سنگباری کی گئی جس کی وجہ سے اُنہیں نقصان پہنچا۔ پولیس نے فوری حرکت میں آتے ہوئے تشدد کرنے والے 200 سے زیادہ بی جے پی کارکنوں بشمول بی جے پی رکن اسمبلی اے رنجن کو کڈاگو ضلع میں گرفتار کرلیا گیا۔